தமிழ் ரசிகர்களுக்காக தொடர்ந்து தரமான படைப்புகளை வழங்கி வரும் ZEE5, தற்போது தனது புதிய ஒரிஜினல் காமெடி வெப் சீரிஸான “செருப்புகள் ஜாக்கிரதை” ஐ வெளியிட்டுள்ளது. S Group தயாரிப்பில், இயக்குநர் ராஜேஷ் சூசைராஜ் இயக்கத்தில் உருவான இந்த வெப் சீரிஸில் நடிகர் சிங்கம்புலி, விவேக் ராஜகோபால், ஐரா அகர்வால், லொள்ளு சபா மனோகர் உள்ளிட்ட பலர் முக்கிய கதாபாத்திரங்களில் நடித்துள்ளனர்.
சீரிஸின் முன் திரையிடல் நிகழ்வு பத்திரிகையாளர் மற்றும் ஊடக நண்பர்களுக்காக பிரத்தியேகமாக நடத்தப்பட்டது. இதனைத் தொடர்ந்து படக்குழுவினர் பத்திரிகையாளர்களை சந்தித்து, தங்கள் அனுபவங்களை பகிர்ந்துகொண்டனர்.
ZEE5 நிறுவனத்தின் கோட்பாடு – புதிய முயற்சிகள்!
ZEE5 நிறுவனம் சார்பில் கௌசிக் நரசிம்மன் பேசியதில், “கடந்த அக்டோபரில் வெளியான ‘ஐந்தாம் வேதம்’ வெற்றி பெற்றது. அதனை தொடர்ந்து, ‘செருப்புகள் ஜாக்கிரதை’ மிகவும் வித்தியாசமான முயற்சி. இது 2 மணி நேர திரைப்பட வடிவத்தில் சொல்லப்படும் ஒரு சுவாரஸ்யமான கதை. தொடர்ந்து ZEE5-ல் இரு மாதத்திற்கு ஒருமுறை புதிய வெப் சீரிஸ்கள் வரவிருக்கின்றன. இந்த கதையை சிங்கம்புலி போன்ற திறமைசாலிகள் உணர்வுப்பூர்வமாக கட்டியெழுப்பியுள்ளனர்” என்றார்.
தயாரிப்பாளர், இயக்குநர் மற்றும் நடிகர்கள் எதிர்பார்ப்புகள்
சீரிஸின் தயாரிப்பாளர் சிங்காரவேலன், “ZEE5க்கு நன்றி. ‘மதில்’ எனும் படைப்புக்கு பிறகு, இந்த புதிய வெப் சீரிஸில் நாங்கள் தொடர்ந்து புதிய முயற்சிகளை மேற்கொண்டிருக்கிறோம். இந்த கதைக்கு சிங்கம்புலி தேவையான நடிகர் என்பதால் அவருடன் இணைந்தோம்” என்று கூறினார்.
இயக்குநர் ராஜேஷ் சூசைராஜ், “ZEE5 நிறுவனத்தின் மூலம் கிடைத்த வாய்ப்புக்கு நன்றி. கௌசிக் நரசிம்மன், சிங்காரவேலன் இருவரும் இல்லையென்றால், இந்த சீரிஸ் உருவாக முடியாது. கதை, காமெடி, நடிகர்கள், ஒளிப்பதிவு என அனைத்தும் சிறப்பாக அமைந்துள்ளன” என்றார்.
நடிகர்கள் மற்றும் தொழில்நுட்ப கலைஞர்கள் பாராட்டு
நடிகர் சிங்கம்புலி, “இந்த கதையில் பங்கேற்பது எனக்கு பெரிய மகிழ்ச்சி. கதை எழுதிய எழுச்சூர் அரவிந்தன், இயக்குநர் ராஜேஷ், ஒளிப்பதிவாளர் கங்காதரன் அனைவரும் அர்ப்பணிப்புடன் உழைத்துள்ளனர்” என்றார்.
நடிகை ஐரா அகர்வால், “இந்த படைப்பில் நடிப்பது எனக்கு வித்தியாசமான அனுபவமாக இருந்தது. தமிழ் மொழி தெரியாதபோதும், கதையின் நுணுக்கங்களை புரிந்து, அதன் டப்பிங்கை செய்ய முடிந்தது எனக்கு பெருமை” என்றார்.
நடிகர் விவேக் ராஜகோபால், “ZEE5 வழங்கிய வாய்ப்பு மூலம், இந்த பிரம்மாண்டமான குழுவில் பணியாற்ற முடிந்தது. இயக்குநர் ராஜேஷின் கதை சொல்லும் திறமை சிறப்பாக இருந்தது” என்று தெரிவித்தார்.
வெளியீட்டுக்கு எதிர்பார்ப்பு!
“செருப்புகள் ஜாக்கிரதை” வெப் சீரிஸ் முற்றிலும் நகைச்சுவையை மையமாகக் கொண்டு உருவாக்கப்பட்டுள்ளது. சிங்கம்புலி, விவேக் ராஜகோபால், ஐரா அகர்வால், லொள்ளு சபா மனோகர், இந்திரஜித், மாப்ள கணேஷ், உடுமலை ரவி, சேவல் ராம் உள்ளிட்ட பலர் நடித்துள்ள இந்த காமெடி சீரிஸ், 28 மார்ச் முதல் ZEE5 தளத்தில் பிரம்மாண்டமாக வெளியாக உள்ளது.
