உலகின் மிகப்பெரிய அமைப்பாக ஆர்.எஸ்.எஸ். வளர்ந்துள்ளது- பிரதமர்

புதுடெல்லி: ‘உலகின் மிகப்பெரிய அமைப்புகளில் ஒன்றாக ஆர்.எஸ்.எஸ். வளர்ந்துள்ளது. விரைவில் 100ஆவது ஆண்டை கொண்டாட இருக்கிறோம். நாட்டுக்கு சேவை செய்வதே ஆர்.எஸ்.எஸ். அமைப்பின் முக்கிய நோக்கம்’ என பிரதமர் நரேந்திர மோடி தெரிவித்துள்ளார்.

பிரபல கணினி விஞ்ஞானியான அமெரிக்காவைச் சேர்ந்த லெக்ஸ் பிரிட்மேன் (41), 2018ஆம் ஆண்டு முதல் பல்வேறு துறைகளைச் சேர்ந்த பிரபலங்களை நேர்காணல் செய்து சமூக வலைதளங்களில் வெளியிட்டு வருகிறார். அமெரிக்க அதிபர் டொனால்டு ட்ரம்ப், இஸ்ரேல் பிரதமர் பெஞ்சமின் நெதன்யாகு, உக்ரைன் அதிபர் ஜெலன்ஸ்கி, தொழிலதிபர் எலான் மஸ்க், பேஸ்புக் நிறுவனர் மார்க் ஜூக்கர்பெர்க், அமேசான் நிறுவனர் ஜெப் பெசோஸ் உள்ளிட்டோரை லெக்ஸ் பிரிட்மேன் பேட்டி கண்டிருக்கிறார்.

இந்நிலையில், பிரதமர் நரேந்திர மோடி அளித்த நேர்காணல் நேற்று சமூக வலைதளத்தில் வெளியானது. அதில் பிரதமர் மோடி கூறியதாவது: “இந்தியாவின் மத மரபுகள் வாழ்வியல் நெறிகளை அடிப்படையாகக் கொண்டவை. இந்து மதம் என்பது வெறும் சடங்கோ, சம்பிரதாயமோ அல்ல. அது ஒரு வாழ்க்கை முறை என்பதை எங்கள் உச்ச நீதிமன்றம் தெளிவுபடுத்தியுள்ளது. உடல், மனம், ஆன்மா ஆகியவற்றை மேம்படுத்தவே விரதம் இருக்கிறோம்.

பசுக்களைப் பாதுகாக்க வேண்டும் என்பது மகாத்மா காந்தியின் விருப்பம். அதற்காக ஓர் இயக்கமே நடத்தப்பட்டது. நாடு முழுவதும் ஒரு நாள் விரதம் இருந்தார்கள். அப்போது நான் பள்ளி மாணவன். பசுக்களைப் பாதுகாக்க வேண்டும் என்ற நோக்கத்தோடு முதல் முறையாக விரதம் இருந்தேன். அப்போதுதான் விரதத்தின் மகத்துவத்தை உணர்ந்தேன். 2014ஆம் ஆண்டு நான் இந்தியப் பிரதமராகப் பொறுப்பேற்றேன். பதவியேற்பு விழாவிற்கு அப்போதைய பாகிஸ்தான் பிரதமர் நவாஸ் ஷெரீப்பை அழைத்தேன். இரு நாடுகளுக்கும் இடையே ஒரு புதிய அத்தியாயம் தொடங்கும் என்று நம்பினேன். ஆனால் என் முயற்சிகள் வீணாயின. பாகிஸ்தான் அமைதியை விரும்பவில்லை. அந்த நாடு மறைமுகப் போரில் ஈடுபடுகிறது. ஆனால் பாகிஸ்தான் மக்கள் அமைதியை விரும்புகிறார்கள். தீவிரவாதம், உள்நாட்டுக் குழப்பங்களால் அவர்கள் சோர்வடைந்துள்ளனர். நிச்சயம் ஒரு நாள் பாகிஸ்தான் அமைதிப் பாதைக்குத் திரும்பும்.

பிப்ரவரி 2002இல் குஜராத்தில் நடந்த கலவரம் மிகவும் வேதனையானது. அதன் பிறகு குஜராத்தில் எந்தக் கலவரமும் நடக்கவில்லை. மாநிலத்தில் శాశ్వత அமைதி நிலவுகிறது. 2002க்கு முன்பு குஜராத்தில் சுமார் 250 கலவரங்கள் நடந்துள்ளன. 1969இல் நடந்த கலவரம் 6 மாதங்கள் நீடித்தது.

சீனாவுக்கும் இந்தியாவிற்கும் இடையே நல்ல உறவு நீடிக்கிறது. இந்த உறவு இன்னும் வலுப்பெறும் என்று நம்புகிறேன். இரு நாடுகளின் எல்லையில் இயல்பு நிலை திரும்பியுள்ளது. 2020க்கு முன்பு இருந்த நிலையை மீண்டும் ஏற்படுத்துவதற்கு இரு தரப்பும் இணைந்து செயல்பட்டு வருகின்றன. இருதரப்பு பேச்சுவார்த்தை தொடர்ந்து நடைபெற்று வருகிறது. 21ஆம் நூற்றாண்டு ஆசியாவின் நூற்றாண்டு. இந்த நூற்றாண்டில் இந்தியாவிற்கும் சீனாவிற்கும் இடையே போட்டி இருக்கலாம். ஆனால் மோதல் இருக்காது.

அமெரிக்காவின் ஹூஸ்டன் நகரில் நடந்த ஒரு நிகழ்ச்சியில் நானும் அமெரிக்க அதிபர் டொனால்டு ட்ரம்பும் கலந்துகொண்டோம். என் அழைப்பை ஏற்று விழா மேடையைச் சுற்றி வந்து பார்வையாளர்களை அவர் உற்சாகப்படுத்தினார். பாதுகாப்பு விதிமுறைகளை மீறி என்னோடு மேடையைச் சுற்றி வந்தார். அவர் மிகவும் துணிச்சலானவர். கடந்த ஆண்டு நடந்த அமெரிக்க தேர்தல் பிரச்சாரத்தின்போது மீண்டும் ஒருமுறை அவரது துணிச்சலைக் கண்டு வியந்தேன். அவர் என்னை நம்புகிறார். எங்களுக்கிடையே ஆழமான நட்பு இருக்கிறது. அதை யாராலும் முறிக்க முடியாது.

மத்திய கிழக்கில் நிலவும் பதற்றம், ரஷ்யா-உக்ரைன் போர், அமெரிக்கா-சீனா உறவில் ஏற்பட்டுள்ள விரிசல் ஆகியவை மிகுந்த கவலையை அளிக்கின்றன. எந்த ஒரு நாடும் தனித்து இயங்க முடியாது. ஒன்றுக்கொன்று சார்ந்தே வாழ வேண்டும் என்பதை கொரோனா பெருந்தொற்று உணர்த்தியுள்ளது. உலக அளவில் ஏற்படும் பதற்றங்களைத் தணிப்பதில் ஐ.நா. சபை உள்ளிட்ட சர்வதேச அமைப்புகள் தோல்வியடைந்துவிட்டன என்று நினைக்கிறேன்.

எங்கள் கிராமத்தில் ஆர்.எஸ்.எஸ். கிளை இருந்தது. அங்கு நாங்கள் ஒன்றாக அமர்ந்து தேசபக்தி பாடல்களைப் பாடுவோம். அப்போதே நான் ஆர்.எஸ்.எஸ். தொண்டராகிவிட்டேன். இன்று உலகின் மிகப்பெரிய அமைப்புகளில் ஒன்றாக ஆர்.எஸ்.எஸ். வளர்ந்துள்ளது. விரைவில் 100ஆவது ஆண்டை நாம் கொண்டாட இருக்கிறோம். நாட்டுக்கு சேவை செய்வதே ஆர்.எஸ்.எஸ். அமைப்பின் முக்கிய நோக்கம். மக்களுக்கு சேவை செய்வதை இறைவனுக்குச் செய்யும் தொண்டாக நாங்கள் கருதுகிறோம். இவ்வாறு பிரதமர் நரேந்திர மோடி தெரிவித்தார்.